ကမ္ဘောဇအုပ်စု၊ ကမ္ဘောဇဘဏ် လီမိတက်သည် KBZ UnionPay အကြွေးဝယ်ကတ်များကို သုံးစွဲသူများအား စတင်ထုတ်ပေးတော့မည် ဖြစ်ပါသည်။
အများမျှော်မှန်းထားသကဲ့သို့ပင် အကြွေးဝယ်ကတ်များသည် UnionPay International (UPI) ငွေပေးချေမှု ကွန်ရက်အောက်တွင် ရှိပြီး Classic ကတ်နှင့် Platinum ကတ်ဟူ၍ ပုံစံနှစ်မျိုးဖြင့် ထုတ်လုပ်ထားသည်။ သုံးစွဲသူများသည် အဆိုပါအကြွေးဝယ်ကတ်များနှင့် ကုန်ပစ္စည်းများ၊ ၀န်ဆောင်မှုများအတွက် ငွေပေးချေနိုင်မည့်အပြင် ငွေသားထုတ်ယူမှုများကိုလည်း သုံးစွဲသူတစ်ဦးချင်းစီ၏ ဘဏ္ဍာရေးအခြေအနေပေါ် မူတည်၍ ကန့်သတ်ချက်တစ်ခုဖြင့် ဆောင်ရွက်နိုင်မည်ဖြစ်သည်။
ငွေကြေးစီမံခန့်ခွဲမှုများအတွက် အသုံးဝင်လှသော အကြွေးဝယ်ကတ်များသည် ကမ္ဘောဇဘဏ်သုံးစွဲသူများ၏ ငွေပေးချေဆောင်ရွက်မှုများအတွက် လွယ်ကူသက်သာမှုရှိစေမည်ဖြစ်သည်။ လစာထုတ်ရက်အထိ မစောင့်ဆိုင်း နိုင်သောအခါမျိုးတွင်ဖြစ်စေ၊ သာမန်ငွေကြေးကိစ္စရပ်များ ဆောင်ရွက်ရာတွင်ဖြစ်စေ အဆိုပါအကြွေး ၀ယ်ကတ်များက လတ်တလောဖြေရှင်းပေးမှာဖြစ်ပြီး ရယူထားသည့် အကြွေးကျန်များကို သတ်မှတ်ထားသည့် ရက်တွင် မိမိယူထားသည့်စာရင်းအတိုင်း ပြန်လည်ပေးဆပ် နိုင်မည်ဖြစ်သည်။
Smart chip နဲ့ တည်ဆောက်ထားပြီး ကတ်လုံခြုံရေးအတွက် ပင်ကုတ်နံပါတ်ပါဝင်ပါသည်။ ထို့အပြင် မြန်မာနိုင်ငံအနှံ့အပြားရှိ ATM စက်များအားလုံးနှင့် ကမ္ဘာတစ်ဝှမ်းရှိ UPI ကွန်ရက် အောက်တွင်ရှိသော ATM စက်များတွင် ငွေထုတ်ယူခြင်း ပြုလုပ်နိုင်သကဲ့သို့ အွန်လိုင်းမှ ငွေပေးချေခြင်း များအတွက်လည်း အသုံးပြုနိုင်မည်ဖြစ်သည်။ အကြွေးဝယ်ကတ် အသုံးပြုရာတွင် အခြေခံငွေကြေးစနစ်မှာ ကျပ်ငွေဖြစ်သည့် အတွက် ကမ္ဘောဇဘဏ်၏ အကြွေးဝယ်ကတ်ကိုင်ဆောင်ထားသူ မြန်မာခရီးသွားများအနေဖြင့် နိုင်ငံတကာမှ စတိုးဆိုင်များတွင် ငွေထုတ်ယူခြင်း၊ ငွေပေးချေခြင်းများကို အဆိုပါနိုင်ငံမှ ငွေကြေးလဲလှယ် နှုန်းထားအလိုက် ဆောင်ရွက်နိုင်မည်လည်း ဖြစ်ပါသည်။
No comments:
Post a Comment